ஐம்பூதங்கள்,ஐந்து வாயுக்கள்,ஐம்புலன்,ஐம்பொறி,
மனம், சித்தம், புத்தி, அகங்காரம் எனும் அந்தகரணங்கள்
ஆகிய இருபத்து நான்கு தத்துவங்களும் அசுத்த தத்துவங்களாக,
ஜீவாத்மா விளக்கமாகக் காட்டப்பட்டது.

ஐந்துறைவாயு – உதானவாயு

கண்டத்தில் நிற்குநற் காற்றுவடி வானதே
கணக்கிட்டு நாத வடிவை
கற்பிக்கும் ஆதாரம் கழுத்துக்குத் தேவாரம்
கவளத்துச் சாத முணவை
பிண்டத்தில் சேர்ப்பிக்கும் பேரறிய சாதகம்
பெயரிலே உதான வாயு
பேச்சுக்கும் மூச்சுக்கும் பேணிடும் சுகத்துக்கும்
பெருந்துணை யான மாயம்
பண்டத்தில் உடலெனும் பாவத்தில் நானெனும்
பவித்திரம் மறைத்த காயம்
பாவிக்கும் ஆணவம் மேவிக்கும் காரணம்
பனியென விலக்க வேண்டும்
அண்டத்தில் உலகெலாம் ஆக்கிய சாக்கியா
ஆனந்தத் திருத் தாண்டவா
ஆண்டவா திருவருள் வேண்டவா குருவடி
அடைக்கலம் நமச்சி வாயா